Niger səlahiyyətliləri Benini neft yüklənməsinə nəzarət etmək üçün bu ölkədə olan beş vətəndaşı qaçırmaqda ittiham edib. 

İqtisadiyyat.az xəbər verir ki, bu barədə "Agence France-Presse" hakimiyyət orqanlarının bəyanatına istinadən məlumat yayıb.

Qeyd olunur ki, iyunun 5-də Benin Seme-Kpoji limanında Nigerdən neftin yüklənməsinə nəzarət etmək missiyası ilə bölgədə olan Wapco-Niger (Qərbi Afrika Boru Kəməri Şirkəti) neft şirkətinin bir neçə əməkdaşı Benin tərəfindən oğurlanıb və o vaxtdan girov saxlanılıb. Niger hakimiyyətinin bəyanatında deyilir: "Niger girov götürülmüş vətəndaşlarının azad edilməsinə nail olmaq, onların hüquqlarını qorumaq və maraqlarını müdafiə etmək üçün bütün tədbirləri görmək niyyətindədir".

Benin tərəfinin məlumatına görə, saxlanılan iki Niger vətəndaşı ora saxta sənədlərlə gəlib və şirkətin işçiləri deyil. Niger səlahiyyətliləri Wapco-Nigerin baş menecerinin müavini Aminu Hadizatu Ibra və dörd şirkət rəhbərinin Benində saxlanıldığını bildirib.