"Dayanıqlı vergi mühiti dayanıqlı iqtisadiyyatın və inkişaf edən cəmiyyətin formalaşmasına əsas verir. Bizim əsas məqsədimiz sahibkarlıq subyektlərinin daha da böyüməsi, biznes subyektləri içərisində kiçik və orta sahibkarların sayının artırılmasıdır".
İqtisadiyyat.az xəbər verir ki, bunu İqtisadiyyat Nazirliyi yanında Dövlət Vergi Xidməti Vergi Siyasəti Baş İdarəsinin rəisi Nicat İmanov "Vergi və Mühasibatlıq Zirvəsi 2024" tədbirində çıxışı zamanı deyib: "Platforma imkan verir ki, dövlət orqanları ilə sahibkarlar arasındakı münasibətlər daha əlçatan, aydın və şəffaf olsun, eyni zamanda dövlət qurumları öz baxışlarını, tələblərini, yanaşmalarını, gözləntilərini bu platforma vasitəsilə sizə çatdırsın".
"Dövlət Vergi Xidmətinin əsas məqsədi dövlət büdcəsinin xərclərini qarşılamağa imkan verən vergi siyasəti tədbirlərini həyata keçirmək, eyni zamanda biznes fəaliyyətinin stimullaşdırılmasıdır. Biznes fəaliyyətinin stimullaşdırılması ilk olaraq biznesin böyüməsinə xidmət edir. Dayanıqlı vergi mühiti dayanıqlı iqtisadiyyatın və inkişaf edən cəmiyyətin formalaşmasına əsas verir. Bizim əsas məqsədimiz sahibkarların daha da böyüməsi, biznes subyektləri içərisində kiçik və orta sahibkarların sayının artırılmasıdır. Sahibkar düşünməlidir ki, o böyüdükcə onun vergi yükü azalır.
Eyni zamanda biznesə şəffaflığı təmin edən gəlir və xərclərin uçotunu aparmağa imkan verən, mənfəət, gəlir vergisi rejiminə keçidləri təşviq etməyi nəzərdə tuturuq. Dövlət Vergi Xidmətinin əsas məqsədi biznesin maliyyə vəsaitlərinə əlçatanlılığını təmin etmək, onların artıq ödəmələrinin sürətli şəkildə geri qaytarılması, depozit qalıqlarının müxtəlif imkanlara sərf edilməsi ilə bağlı imkanların genişləndirilməsi kimi hədəflər qarşıdakı dövrlər üçün nəzərdə tutulur.
Əlbəttə ki, iqtisadiyyatın böyüməsi və genişlənməsində verginin şəffaflığı, vergi siyasətinin rolu az deyil. Vergi təkcə fiskal əhəmiyyət daşımır, eyni zamanda iqtisadiyyatın tənzimlənməsində mühüm alət kimi də çıxış edir.
Biz qarşıdakı dövrlərdə də vergi yığımı ilə yanaşı, sürətli inzibatçılığın qurulmasına, vergi qanunvericiliyinə əməl edən sahibkarları dəstəkləməyə davam etməyi, vergidən yayınmaqla qanunsuz vergi üstünlüyü əldə edən və bununla vətəndaş cəmiyyətinə, biznes mühitinə zərər vurmağın qarşısının alınmasına köklənmişik.
Bizim əsas hədəf baxışımız etibarlı vergi orqanına çevrilmək, eyni zamanda vergilərin könüllü şəkildə yığılmasını təmin etməkdir. Vergilərin könüllü səkildə yığılmasına imkan isə şəffaflıqdan, vergi mədəniyyətinin formalaşmasından keçir", - deyə N. İmanov bildirib.
