İsrailin baş naziri Benyamin Netanyahu anklavın HƏMAS hərəkatına qarşı əməliyyat çərçivəsində İsrail əsgərlərinin Qəzza zolağının cənubundakı Rəfah şəhərinə daxil olmasının qarşısını almaq üçün göstərilən beynəlxalq təzyiqlərə müqavimət göstərməyə davam edəcəyinə söz verib.

İqtisadiyyat.az xəbər verir ki, bu barədə Nazirlər Kabinetinin rəhbəri Mahane Ofer hərbi bazasına səfəri zamanı müvafiq bəyanatla çıxış edib.

"İsrail ordusu hərbi əməliyyatları davam etdirməyə hazırlaşarkən, beynəlxalq təzyiqlər var ki, bunun məqsədi bizim Rəfaha daxil olmağın və başlamış işi başa çatdırmağın qarşısını almaqdır. İsrailin baş naziri kimi mən bu təzyiqi rədd edirəm. Mən bu təzyiqi dəf etməyə davam edəcəyəm, Rəfaha girəcəyik, qalan HƏMAS batalyonlarının ləğvini başa çatdıracağıq, təhlükəsizliyi bərpa edəcəyik və xalqın və İsrail dövlətinin tam qələbəsini təmin edəcəyik", - deyə Netanyahu bildirib.

Martın 12-də ABŞ-İsrail İctimai Əlaqələr Komitəsinin konfransında Netanyahu bildirib ki, İsrail HƏMAS üzərində qələbəyə nail olmaq üçün Rəfahda əməliyyat keçirəcək, lakin mülki vətəndaşların təhlükəli əraziləri tərk etməsinə icazə verəcək.