2025-ci ilin avqust ayı üçün çatdırılacaq "Brent" markalı neftin fyuçers qiyməti cümə günü 23 apreldən bəri ilk dəfə olaraq 68 dollardan yuxarı qalxıb.
İqtisadiyyat.az xəbər verir ki, xəbər hazırlandığı ana qədər bir barelin qiyməti 1,76 faiz artaraq 68,05 dollar olub.
Karbohidrogenlərin qiymətində baş verən bu artım ABŞ və Çin nümayəndə heyətləri arasında ticarət sazişi ilə bağlı danışıqlarda irəliləyiş əldə olunması fonunda baş verib.
Günün ortalarında "Brent" markalı neftin bir bareli təxminən 66,5 dollara satılırdı. Daha sonra bir neçə mərhələdə qiymət kəskin şəkildə artaraq 68 dollar səviyyəsinə çatıb. Bu sıçrayışın əsas səbəbi ABŞ Prezidenti Donald Trampın razılaşmanı təsdiqləməyə hazır olduğunu bəyan etməsi olub.
Razılaşmanın şərtləri arasında Çinin ABŞ-yə nadir torpaq elementləri tədarük etməsi və Çin tələbələrinin Amerika universitetlərinə qəbuluna dair öhdəliklər yer alır.
Həmçinin may ayının ortalarında ABŞ və Çin qarşılıqlı olaraq mallara tətbiq etdikləri tarifləri müvəqqəti olaraq azaldıblar – ABŞ 145%-dən 55%-ə, Çin isə 125%-dən 10%-ə endirib. Bu tariflərin danışıqlardan sonra sabitləşəcəyi gözlənilir.
