İqtisadiyyat.az xəbər verir ki, bu geosiyasi gərginlik, xüsusilə də Hörmüz boğazının təhlükə altına düşməsi, dünya enerji bazarında ciddi dalğalanmalara yol aça bilər.

İraqın xarici işlər naziri və baş nazirin müavini Fuad Hüseyn, Almaniyalı həmkarı Yohan Vadeful ilə telefon danışığı zamanı bildirib ki, regionda hərbi əməliyyatların genişlənməsi halında neftin qiyməti bir barel üçün 200–300 ABŞ dollarına qədər yüksələ bilər.

Onun sözlərinə görə, Hörmüz boğazının bağlanması təkcə regional deyil, qlobal miqyasda iqtisadi şoklar doğura bilər. Çünki dünya üzrə daşınan neftin təxminən 20%-i məhz bu boğazdan keçir. Bu marşrutun bağlanması nəinki qiymətləri artıracaq, həm də təchizat zəncirində böyük gecikmələr və iqtisadi sabitsizlik yarada bilər.

Mütəxəssislər qeyd edirlər ki, bu cür ssenaridə enerji asılılığı yüksək olan ölkələr daha ağır zərbə alacaq. Eyni zamanda, enerji bazarlarında qeyri-müəyyənlik artacaq, bu da inflyasiyanı sürətləndirə və maliyyə bazarlarında panikaya səbəb ola bilər.