Enerji təhlükəsizliyi və yaşıl keçid üzrə məsuliyyət bərabər paylaşılmalıdır.

İqtisadiyyat.az Energetika Nazirliyinə istinadən verdiyi məlumata görə, bunu energetika naziri Pərviz Şahbazov Vyanada “Dayanıqlı və inklüziv enerji keçidinə doğru” mövzusunda keçirilən 8-ci OPEC beynəlxalq seminarında çıxışı zamanı bildirib.

Nazir son illərdə neft-qaz sektoruna investisiyaların azalmasını bazarda sabitlik və dayanıqlı enerji təhlükəsizliyi üçün başlıca risklərdən biri kimi qeyd edib.

O bildirib ki, bugünkü 100 trilyon dollarlıq qlobal iqtisadiyyatın istifadə etdiyi enerjinin 80 %-dən çoxu karbohidrogenlərdən asılıdır və bu asılılığa qısa müddətdə yüksək ambissiyalı siyasi qərarlarla tamamilə son qoymaq irrealdır. “Qarşıdakı onilliklərdə ətraf mühiti qorumaqla enerji təhlükəsizliyini, ədalətli, inklüziv enerji keçidini təmin etmək üçün bizim rasional qərarlara və təxirəsalınmaz tədbirlərə ehtiyacımız var. Bu, isə enerji bazarlarının iştirakçıları arasında dialoq və əməkdaşlıq olmadan mümkün deyil”.