Naxçıvan Muxtar Respublikasında çayda yerləşən faydalı yataq satışa çıxarılır.

İqtisadiyyat.az-ın əldə etdiyi məlumata görə, Şərur rayonu “Arpaçay” çınqıl-qum qarışığı yatağı hərraca çıxarılır.

6,3 hektar ərazini əhatə edən və 252000 kub metr həcmində olan yatağın istismad müddəti 20 il nəzərdə tutulub. 

Hərracın başlanğıc qiyməti 25200 manat təşkil edir.

Qeyd edək ki, çınqıl və qumlar dağ çaylarının aşağı axınlarında daha geniş yayılıb. Qeyd olunan çöküntülər tikinti işlərində, dəmir yollarında ballast material kimi və avtomobil yollarının tikintisi məqsədilə istismar olunur.

Naxçıvan MR-də onların sənaye əhəmiyyətli yığımları Arpaçay, Naxçıvançay, Əlincəçay, Gilənçay, Ordubadçay, Gənzəçay və s. çaylarda aşkar edilib. Bunların böyük əksəriyyəti müasir çöküntülərə aiddir.

Arpaçay yatağı Şərur rayonunun Dizə kəndindən 400 – 500 m cənubda, Şərqi Arpaçayın hövzəsində yerləşir. Yatağın geoloji quruluşunda Müasir və Dördüncü dövr çöküntüləri iştirak edir və iri daş-çınqıl və qumlarla təmsil olunub. Faydalı qat 5 m dərinliyədək öyrənilib. Tərkibində dolomitləşmiş, kristallaşmış əhəngdaşları və əsas tərkibli digər süxurlar təşkil edir.

Arpaçay yatağının çınqılları yuyulduqdan sonra “400” markalı sementdən istifadə etməklə, “225” və “300” markalı beton istehsalında istifadə oluna bilər. Qumun həcm kütləsi 1400 – 1600 kiloqram kub metr, irilik ölçüsü 1,17 –  2,74, gilli, lilli və tozvari hissəciklərin miqdarı 2,5 – 10% təşkil edir. Çınqıl və qum yuyulduqdan sonra hidrotexniki beton istehsalına yararlıdır.