NATO-nun baş katibi Yens Stoltenberq Gürcüstanın yeni baş naziri İrakli Kobaxidze ilə görüşüb və bu ölkənin NATO və Avropa İttifaqının (Aİ) bir hissəsi olmasını dəstəklədiyini bildirib.

İqtisadiyyat.az xəbər verir ki, görüş NATO-nun mənzil-qərargahında baş tutub.

Stoltenberq NATO-nun tərəfdaşı olan Gürcüstanın suverenliyini və ərazi bütövlüyünü dəstəklədiyini bildirib və Rusiyanın işğal etdiyi bölgələrdə ilhaq qərarının qəbuledilməz olduğunu vurğulayıb.

Gürcüstan və NATO arasında tərəfdaşlığın daha da necə inkişaf etdiriləcəyini müzakirə edəcəklərini bildirən Stoltenberq qeyd edib: "Gürcüstanın Avro-Atlantik ailəsinə tam üzvlük, daha çox demokratiya və rifah istiqamətində irəlilədiyini görmək istəyirik".

Kobaxidze isə bildirib ki, onun vəzifəyə keçdikdən sonra ilk xarici səfəri Brüssel, Aİ və NATO-ya olub və bu, onun ölkəsini sözügedən ailənin bir hissəsi etmək istəyini əks etdirir.

Ölkəsinin bu illər ərzində NATO-nun rəhbərlik etdiyi missiya və əməliyyatlarda iştirak etdiyini deyən Kobaxidze bunun müdafiə qabiliyyətinin NATO ilə uyğunlaşmasına töhfə verdiyini bildirib.

Kobaxidze ölkəsinin ərazisinin 20 faizinin işğal altında olduğunu vurğulayıb və NATO və müttəfiqlərini ölkəsini hər zamankindən daha çox dəstəkləməyə çağırıb.

Qeyd edək ki, Gürcüstan Aİ-yə namizəd ölkə statusunu 2023-cü ilin dekabrında alıb.