Yeni dəyişikliyə görə, narkotikin təsiri altında avtomobil idarə edənlər  600 manat məbləğində cərimə ediləcək və ya sürücülük hüququ 6 aydan 1 ilədək müddətə məhdudlaşdırılacaq. Maraqlıdır ki, yeni qərar narkotik vasitələrdən istifadə edən sürücülərin sayını azalda biləcəkmi?

 

 

Mövzu ilə bağlı narkomaniya üzrə ekspert Emil Maqalov İqtisadiyyat.az-a açıqlamasında bildirib ki, sözügedən cərimənin məbləğinin artırılması narkomaniya ilə mübarizədə effektiv olmayacaq:

"Narkotikin təsiri altında avtomobil idarə edənlərin cərimələnməsi əvvəlki illərdə də mövcud idi. Sadəcə yeni dəyişiklik nəticəsində cərimə məbləği 100-200 manat civarında artırılıb. Bu qərar yüngül narkotik vasitələrdən istifadə edənlərə qismən təsir göstərəcək. Sadəcə yeni narkotik vasitələrdən, yəni "patı", Amfetamin və Metamfetaminlərdən istifadə edən insanlar bir müddət sonra psixoloji və fizioloji asılılığa düşür. Cərimə tətbiq etməklə, bunun qarşısını almaq qeyri-mümkündür. Həmin insanlar artıq xəstəyə çevrilir və qeyd etdiyim narkotik vasitələrdən "dərman" kimi istifadə edirlər. Bu cür sürücülərin cərimələnməsi vəziyyətdən sui-istifadə edilməsinə oxşayır. Belə ki, nəzərdə tutulan qərar qurumlar üçün sadəcə gəlir mənbəyi olacaq".

Ekspert deyir ki, əgər qərara tam məsuliyyətlə yanaşılsa, həmin şəxslər müalicə mərkəzlərinə yönəldilməlidir. Bu isə müalicə mərkəzləri və aidiyyatı qurumlar üçün xaos yaradacaq:

"Narkotikin təsiri altında avtomobil idarə edənlərin cərimələnməsi yox, müalicə edilməsi məqsədəuyğundur. Problem budur ki, müalicə mərkəzlərinin sayı cəmi 6-dır. Bu mərkəzlər də həmişə dolu olur və boş yer tapılmır. Ona görə də yeni narkodispanserlər tikilməlidir. Narkomanların psixoloji asılılıqdan azad olması üçün reabilitasiya mərkəzləri olmalıdır. Təəssüf ki,  dövlətə məxsus reabilitasiya mərkəzləri  yoxdur. Özəl reabilitasiya mərkəzlərində isə qiymət 1000-1500 manat civarındadır. Hər adamın bu mərkəzə üz tutmağa imkanı olmur. Bu problemin qismən həllinin yolu Səhiyyə Nazirliyi və "Global Found"un birgə keçirdiyi "Zərərin Azaldılması" layihəsinin icra olunmasından keçir". 

Gülşən Şərif