Türkiyədə baş verən dəhşətli zəlzələ həm 10 şəhərdə, həm də qonşu Suriyada böyük dağıntılara və insan itkisinə səbəb olub. Türkiyədə həyatını itirənlərin sayı 30 mini keçib.

Həyatını itirənlər isə təkcə Türkiyə vətəndaşları deyil, həm də suriyalılardır. Hansı ki, illər öncə daxili savaşdan qaçıb Türkiyəyə sığınmış və sərhədə yaxın Hatay vilayətində, xüsusilə Antakya şəhərində yerləşmişdilər. Şəhərin çoxlu sayda köhnə binalarında yaşayan xeyli suriyalı zəlzələ nəticəsində həyatını itirib. Onların bir çoxunun həyatda qalan yaxınları ölən doğmalarının məhz Suriyada dəfn olunmasını istəyib. Suriyanın Türkiyə ilə sərhəddində yerləşən Babülhava sərhəd buraxılış məntəqəsindən verilən məlumata görə, fevral ayının 12-nə qədər Hataydan Suriyaya 1126 suriyalının cənazəsi göndərilib. Dağıntılar altında axtarışlar davam etdiyindən ölü sayının artacağı gözlənilir. 

Zəlzələ Suriyada da böyük itkiyə səbəb olub. Rəsmi rəqəmlərə görə, ölənlərin sayı 3500 civarındandır, amma bura qeydiyyatdan kənar dəfn edilənlər daxil deyil. Başqa sözlə desək, ölənlərin sayının rəsmi rəqəmlərdən daha çox olduğu bildirilir.