“Bizim cəmiyyət müəllimə çox yüklənib.”

İqtisadiyyat.az xəbər verir ki, bunu Milli Məclisin deputatı Ceyhun Məmmədov parlamentin Elm və təhsil komitəsində müzakirəyə çıxarılan “Təhsil haqqında” və “Məktəbəqədər təhsil haqqında” qanunlara təklif edilən dəyişiklik layihəsində əksini tapıb.

Deputat bir neçə gün əvvəl rayonların birində müəllimə üzük hədiyyə olunması məsələsini xatırladıb: "Son günlər mətbuatda müəllimlərlə bağlı yazılar görürük. Rayonların birində müəllimə üzük bağışlanması məsələsi gündəmə gəldi. Düzdür, müəllim nümunəvi olmalıdır. Ancaq biz və media müəllimin nüfuzunu qorumalıyıq. Davamlı olaraq bununla bağlı müzakirələrin aparılması, müəllim obrazı ilə bağlı mənfi nəticələrə gətirib çıxarır. Bizim cəmiyyət müəllimə çox yüklənib. Müəllim rüşvət ala bilməz, amma davamlı olaraq müəllimin hədəf alınması onun tədris prosesindəki fəaliyyətinə mənfi təsir göstərir".

C.Məmmədov bu kimi məsələlərdə dəqiqləşdirmə aparılmasının vacibliyi ilə bağlı çağırış edib: "Son hadisələr bir daha onu göstərdi ki, bəzi təşəbbüslər valideynlər tərəfindən irəli sürülür. Valideynlər də bundan uzaq olmalıdır".