“Mr.Fix” markası ilə müxtəlif tikinti məhsulları istehsal edən “Kartaş Ltd.” Məhdud Məsuliyyətli Cəmiyyəti (MMC) valyuta tənzimi qaydalarını pozub.

İqtisadiyyat.az xəbər verir ki, buna görə də şirkət barəsində Azərbaycan Mərkəzi Bankı (AMB) tərəfindən İnzibati Xətalar Məcəlləsinin 430.4-cü maddəsinə əsasən cərimə protokolu tərtib edilib.

Daha sonra protokol baxılması üçün Binəqədi Rayon Məhkəməsinə göndərilib və iş hakim Fərid Əmirəliyevin icraatına verilib.

Şirkətin barəsində protokol tərtib olunan maddədə deyilir ki, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.

Qeyd edək ki, Kartaş MMC 2000-ci ildə Azərbaycanda yaradılıb və Mr. Fix brendi ilə tikinti kimyəviləri istehsalına başlayıb. 6,4 milyon manat nizamnamə kapitalına malik olan şirkətin rəhbəri “Mr.Fix”in baş direktoru türkiyəli iş adamı Necmeddin Taşbağadır.