Polşanın Baş naziri Mateuş Moraveyski Almaniya ilə əlaqələrinin uzun illər davam edəcəyini, lakin ölkəsinin İkinci Dünya Müharibəsindəki itkilərə görə istədiyi təzminatdan vaz keçməyəcəyini bildirib.

İqtisadiyyat.az xəbər verir ki, nazir bu barədə Polşanın radio proqramlarından birinə danışıb.

Almaniyanın Varşava səfiri Tomas Baggerin iki ölkə arasında təzminat məsələsinin hüquqi baxımdan bağlandığına dair açıqlamalarını xatırladan Moraveyski deyib ki, Bagger təkcə mənəvi deyil, həm də siyasi səhvə  yol verib. Həmçinin, Polşa xarici işlər nazirinin müavini Arkadiuş Mularçik ölkəsinin Almaniyadan təzminat almaq üçün böyük səy göstərdiyini vurğulayıb.

Xatırladaq ki, 2022-ci il sentyabrın 1-də Polşa hökuməti İkinci Dünya Müharibəsi zamanı Polşanın məruz qaldığı maliyyə itkilərinin təfərrüatlarını əks etdirən geniş hesabat hazırlayıb və müvafiq olaraq Almaniyadan 1,3 trilyon avro təzminat tələb edib.