Türkiyədə baş verən dəhşətli zəlzələdən bir həftədən çox vaxt keçməsinə baxmayaraq, hələ də dağıntılar altından sağ çıxarılan insanlar var. Axtarış-xilasetmə işlərinə dünyanın müxtəlif ölkələrindən minlərlə xilasedici cəlb edilib. Xilasedicilərin əsas yardımçı vasitələrindən biri də adını tez-tez türk xəbər buraxılışlarında eşitdiyimiz termal kameralardır.

İqtisadiyyat.az saytı bu cihazın necə işlədiyinə dair kiçik bir araşdırma aparıb.

Bu, gözlə görünməyən istilik enerjisini görüntüləyən bir sistemdir.  Onun funksiyası elektromaqnit spektrinin infraqırmızı dalğalarını görünən bir mənzərəyə çevirməkdən ibarətdir. Daha da konkretləşdirsək, termal kameralar canlı orqanizmin yaydığı görünməz istiliyi aşkar edir. Bu cihazın çəkdiyi fotoda isti bölgələr açıq rənglərlə, soyuq yerlər isə tünd rənglərlə təsvir olunur. Ən soyuq bölgəni mavi, ən isti bölgəni isə sarı rəngdə göstərir. Ətraf mühitin temperaturundan asılı olaraq mavidən sarıya və ya qırmızıya keçir.

Hərbi və mülki ərazilərdə geniş şəkildə tətbiq edilən termal kamera sistemləri istilik dəyişkənliyinin müşahidə edildiyi hər sahədə istifadə olunur. Daha detallı sıralamalı olsaq, buxar, təzyiqli qaz, isti su, isti hava daşıyan sistemlərdə sızmaların aşkar edilməsi, elektrik panellərinin, ötürücü xətlərin, həddindən artıq yüklənmiş enerji sistemlərinin və istilik yaradan yerlərin qoşulma xətalarının aşkar edilməsi və digər çoxsaylı problemlərin həllində geniş tətbiq edilir. 

Zəlzələ bölgəsində termal kameralardan dağıntı altında canlı olub olmadığını müəyyən etmək üçün istifadə olunur. İnsan dağıntı altında huşunu itirmiş və ya səs çıxara bilməyəcək halda ola bilər. Bu vəziyyətdə məhz termal kamera köməyə gəlir. Cihaz canlıların bədənlərindən çıxan istiliyi "görür". Beləliklə, həmin canlının yeri onun bədənindən ayrılan istilik əsasında müəyyən edilir. Daha sonra müəyyən edilmiş yerə uyğun olaraq xilasetmə işlərinə başlanılır. 

Türkiyədəki fəlakətin dağıntı altında sağ qalan zərərçəkənləri məhz termal kameralar sayəsində aşkar edilərək sağ çıxarılmaqdadır.