Avrasiya İqtisadi İttifaqının (Aİİ) sənaye istehsalı 2023-cü ilin birinci yarısında illik müqayisədə 3% artıb.
İqtisadiyyat.az xəbər verir ki, bunu Rusiyanın baş naziri Mixail Mişustin ittifaqın hökumətlərarası şurasının iclasında bildirib.
"Yüksək əlavə dəyərə malik məhsulların istehsalına başlamaq üçün sənaye kooperasiyasının dərinləşdirilməsi istiqamətində bir sıra ciddi addımlar atmışıq. İlin ilk altı ayında sənaye istehsalı ötən ilin müvafiq dövrü ilə müqayisədə təxminən 3 faiz artıb", - o vurğulayıb.
Mişustin qeyd edib ki, Aİİ ölkələri böyük nəticələr əldə etməyə qadirdir: “Ümid edirik ki, buna yaxın vaxtlarda İttifaqın büdcəsi hesabına perspektivli layihələrin maliyyələşdirilməsi üçün fövqəlmilli mexanizmlərin işə salınması kömək edəcək”.
Avrasiya İqtisadi İttifaqına (Aİİ) üzv dövlətlər Rusiya, Ermənistan, Belarus, Qazaxıstan və Qırğızıstandır.
