Misir prezidenti Əbdülfəttah əs-Sisi Müdafiə Nazirliyinin rəhbərliyi və Misir ordusunun ali komandanlığı ilə regiondakı mövcud vəziyyət və bunun Misirin milli təhlükəsizliyinə təsiri ilə bağlı görüş keçirib.
İqtisadiyyat.az xəbər verir ki, bu barədə dövlət başçısının rəsmi nümayəndəsi Əhməd Fəhmi məlumat verib.
"Misir Prezidenti müdafiə naziri, Silahlı Qüvvələrin Baş Qərargah rəisi və bəzi hərbi hissələrin komandirləri ilə görüş keçirdi", - Fəhmi "Facebook" səhifəsində qeyd edib.
O vurğulayıb ki, Sisi görüşdə iştirak edən hərbi liderlərlə cari regional və beynəlxalq hadisələrdə baş verən dəyişiklikləri, onların Misirin milli təhlükəsizliyinə təsirini və bunun nəticələrini müzakirə edib.
Bəyanatda qeyd olunub ki, görüşdə həmçinin Misirin BMT agentlikləri və bütün dost ölkələrlə koordinasiyalı şəkildə Qəzza zolağında pisləşən humanitar şəraitin yumşaldılması üçün Fələstin xalqına dəstək istiqamətindəki mövqeyi və səyləri nəzərdən keçirilib.
