Aprelin 25-də Ermənistan xarici işlər naziri Ararat Mirzoyan ilə Serbiya Respublikası Baş nazirinin birinci müavini və xarici işlər naziri İvitsa Daçiç arasında telefon danışığı olub.
İqtisadiyyat.az xəbər verir ki, bu barədə Ermənistan Xarici İşlər Nazirliyi məlumat yayıb.
Məlumata görə, siyasi dialoqun və qarşılıqlı maraq doğuran sahələrdə əməkdaşlığın inkişafına yönəlmiş ikitərəfli gündəliyə aid məsələlər müzakirə edilib. Hər iki tərəf bu məqsədlə yüksək səviyyəli qarşılıqlı səfərlərin və vaxtaşırı məsləhətləşmələrin vacibliyini vurğulayıblar.
Həmsöhbətlər çoxtərəfli gündəliyə aid məsələlər ətrafında fikir mübadiləsi aparıblar.
Ermənistan və Serbiyanın xarici işlər nazirləri regional məsələlərə toxunublar. Nazir Mirzoyan Cənubi Qafqazda davamlı sülhün əldə edilməsinin, Ermənistanla Azərbaycan arasında münasibətlərin tənzimlənməsinin, o cümlədən demarkasiya prosesində ərazi bütövlüyü prinsipinə qeyd-şərtsiz hörmət edilməsinin və 1991-ci il Alma-Ata Bəyannaməsinə sadiqliyin əhəmiyyətini qeyd edib.
