Milli Məclisin yaz sessiyasının ilk iclasında Birinci Qarabağ müharibəsi zamanı böyük qəhrəmanlıq göstərərək şəhidlik zirvəsinə ucalmış, kəşfiyyatçı Ülfət Kərimova Milli Qəhrəman adının verilməsi məsələsi təklif olunub.

İqtisadiyyat.az xəbər verir ki, bu təkliflə Milli Məclisin deputatı Mircəlil Qasımlı çıxış edib.

O, şəhid Ülfət Kərimova Milli Qəhrəman adının verilməsi ilə bağlı müraciəti səsləndirib. Deputat çıxışında məhz Müzəffər Ali Baş Komandan İlham Əliyevin müdrik rəhbərliyi şəhidlərimizin canı, qazilərimizin qanı hesabına tarixi torpaqlarımızın işğaldan azad olunduğunu vurğulayıb.

M.Qasımlı həmçinin bu gün azad olunmuş torpaqlarda genişmiqyaslı bərpa və quruculuq işlərinin sürətlə aparıldığını xatırladıb. Deputat o cümlədən bu gün dövlətimizin quruculuq siyasəti sayəsində Kəlbəcərin sürətlə bərpa edildiyini bildirib.

Xatırladaq ki, Kərimov Ülfət Ələkbər oğlu 1971-ci il fevralın 23-də Kəlbəcər şəhərində anadan olub. O, orta məktəbi bitirdikdən sonra hərbi xidmətə çağırılıb. Sovet ordusunda xidmətini başa vurduqdan sonra Azərbaycana qayıdan Ü.Kərimov indiki Azərbaycan Dövlət Neft və Sənaye Universitetinə daxil olur. Amma Vətənin dar günündə ürəyi vətən eşqi ilə vuran Ülfət Kərimov təhsilini yarımçıq qoyaraq könüllü şəkildə döyüşçülərin sırasına qatılıb. Erməni işğalçılarına qarşı gedən ağır döyüşlərdə Ülfət Kərimov cəsurluğu, qormazlığı ilə seçilib. O, 5 sentyabr 1992-ci il tarixdə Ağdərə rayonunun Qozlu kəndi uğrunda gedən döyüşlərdə düşmənə məxsus bir ədəd tank (T-72), bir ədəd PDM-i, bir ədəd «PK» pulemyotunu, üç ədəd «RPQ-7»-ni və xeyli atıcı silah, hərbi sursatı qənimət kimi ələ keçirmiş və 22 qulduru məhv edib. 2 oktyabr 1992-ci il tarixində Laçın rayonunun Hoçaz dağında Ülfət Kərimov 3 ədəd tank, 2 ədəd «PDM-2», 2 AQS-17, 2 ədəd minaatan(120 mm.-lik) qənimət kimi ələ keçirib və 2 ədəd tankını 70-dən artıq canlı qüvvəsini məhv edib. İkinci həmlədə isə əlbəyaxa vuruşaraq düşmənin 11 əsgərini və bir tabor komandirini əsir tutub, 15 nəfər erməni quldurunu məhv edib.

Ülfət Kərimov Kəlbəcər rayonunun Ağdaban kəndi uğrunda gedən qeyri-bərabər döyüşlər zamanı əhalinin yaşayış məntəqəsini sağ-salamat tərk etməsinə nail olub. Döyüşdə yaralanan döyüşçü son nəfəsində də sayıqlığını itirməyib düşmənin zirehli texnika kalonuna qarşı vuruşub, qumbaratanla 1 tankını məhv edib, əlində qumbara ilə digər tankın üsütnə çıxaraq qumbaranı tankın lyukundan içəri ataraq onu məhv edib. Düşmən tankının üstündən tullanarkən düşmənə məxsus PDM tərəfindən atəş açılıb və Ülfət Kərimov yaralanıb. O yaralı halda əlində qumbara ilə ona yaxınlaşan düşmənə məxsus PDM-in altına tullanıb, onu partladaraq qəhrəmancasına şəhid olub. Ülfət Kərimov Vətənin müdafiəsində göstərdiyi misilsiz qəhrəmanlığa görə ölümündən sonra "Azərbaycan Bayrağı" ordeni ilə təltif olunub.