“Yaşıl Elm” platformasının dəvəti və “Elm Azərbaycan” platformasının təşkilati dəstəyi ilə türkiyəli dünya şöhrətli alim, 17 ölkənin Elmlər Akademiyasının, Ümumdünya Geoloqlar Birliyinin üzvü, Cənubi Qafqazın yeni geoloji xəritəsinin müəllifi Pr. Dr. Cəlal Şengörün Bakıda elmsevərlərlə görüşü baş tutacaq.
İqtisadiyyat.az xəbər verir ki, konfransda elm tarixi, sosial təkamül, insanlığın keçdiyi mədəni mərhələlər, elmin tədqiqat və işləmə mexanizmləri kimi mövzularda müzakirələr aparılacaq. Bununla yanaşı, məşhur geoloq ölkəmizdəki palçıq vulkanları və Cənubi Qafqazın geoloji-seysmoloji quruluşu haqqındakı təəssüratlarını tədbir iştirakçıları ilə bölüşəcək. Elmi konfransda həmçinin tədbir iştirakçıları ilə sual-cavab da planlaşdırılıb.
Maraqlananlar üçün bildirək ki, tədbir mayın 23-ü saat 19:00-da “Avropa Azərbaycan” məktəbinin konfrans zalında baş tutacaq. Qeyd edək ki, İqtisadiyyat.az elmi konfransın media tərəfdaşıdır.
