Azərbaycan Mərkəzi Bankının (AMB) yeni binasının tikintisi sürətlə davam etdirilir. 

İqtisadiyyat.az xəbər verir ki, AMB-nin yeni binasının layihəyə uyğun olaraq son mərtəbələrinin tikintisi, paralel olaraq şüşə fasadla üzlənməsi yekunlaşmaq üzrədir. 

Layihəni icra edən Türkiyənin “Tekfen İnşaat” şirkəti tikinti işlərinin 2025-ci ilin fevral ayında yekunlaşdırılacağını açıqlayıb. 

2021-ci ildən inşasına başlanılan AMB-nin yeni binasının hündürlüyü 163,8 metr, 37 mərtəbədən ibarət olacaq. Bina ümumilikdə 35 752 kvadratmetr sahəyə malikdir. Layihənin dizaynı eyni zamanda Frankfurtdakı Avropa Mərkəzi Bankının dizayneri olan avstriyalı Koop Himmelblauya məxsusdur.  

Qeyd edək ki, AMB yeni binasına böyük həcmdə vəsaitin ayrılması ilə gündəmə gəlib. Son açıqlanan rəqəmlərə əsasən AMB-nin yeni binasının tikintisinə çəkilən xərc 637 milyon manata çatıb. 

Xatırladaq ki, Mərkəzi Bankın yeni binasının tikintisini həyata keçirən Türkiyənin “Tekfen İnşaat” şirkəti bundan əvvəl İqtisadiyyat Nazirliyi, Olimpiya Stadionu və SOCAR Tower kimi layihələri də icra edib.