Azərbaycan Mərkəzi Bankı (AMB) ötən ay 5 banka icrası məcburi sərəncam verib, 3 bankın isə vəzifəli şəxsini cərimələyib.

Bu barədə İqtisadiyyat.az AMB-dən məlumat əldə edib.

Belə ki, Mərkəzi Bank “Azər-Türk Bank” ASC-yə “Bank kapitalının və onun adekvatlığının hesablanması Qaydaları”nın 14.1-ci bəndinin tələbini pozduğuna görə müvafiq pozuntunun qısa müddətdə aradan qaldırılması və qeyd olunan halların gələcəkdə təkrarlanmaması üçün daxili prosedurların təkmilləşdirilməsi ilə bağlı icrası məcburi sərəncam verib.

Sözügedən bənddə deyilir ki, sistem əhəmiyyətli banklar istisna olmaqla, digər banklar leverec əmsalını 4 (dörd) faizdən az olmayan səviyyədə saxlamalıdır. Məlumat üçün bildirək ki, leverec əmsalı bankın I dərəcəli kapitalının balans aktivlərinə və balansdankənar öhdəliklərə (bankın hesablarında girov qoyulmuş Azərbaycan Respublikasının milli valyutası ilə, xarici valyuta ilə və ya bank metalları ilə təmin olunmuş hissəsi istisna olmaqla) nisbəti kimi hesablanır.

Eyni zamanda AMB “Rabitə Bank” ASC-yə də icrası məcburi sərəncam verib. Belə ki, bank tərəfindən məcmu halda likvidliyin örtülmə əmsalının düzgün hesablanmaması nəticəsində 15 yanvar tarixinə Mərkəzi Banka təqdim edilən hesabatda Mərkəzi Bankın “Banklarda likvidlik riskinin idarə edilməsi Qaydası”nın 7.2-ci bəndi ilə müəyyən edilmiş həddən yuxarı saxlanması tələbini təmin etmədiyinə görə Mərkəzi Bank tərəfindən “Rabitə Bank” ASC-yə bu sahədə daxili nəzarət sistemlərinin təkmilləşdirilməsi ilə bağlı icrası məcburi sərəncam verilib.

Sözügedən bənddə deyilir ki, 2023-cü ilin 1 dekabr tarixinə likvidliyin örtülmə əmsalı məcmu halda və xarici valyutada ayrılıqda 100 faiz və ya bundan yuxarı olan banklar həmin əmsalların 100 faizdən aşağı həddə düşməməsini təmin etməlidir.

Ötən ay  icrasi məcburi sərəncam verilən banklardan digərləri “Accessbank”, “Yelo Bank” və “Unibank”dır. AMB bu banklara “Valyuta əməliyyatları barədə vahid informasiya sistemi haqqında Əsasnamə”nin 7.5-ci bəndinin tələblərinə zidd olaraq valyuta mübadiləsi əməliyyatlarına dair məlumatları təyinatı üzrə valyuta nəzarətinin həyata keçirilməsi məqsədilə formalaşdırılmış informasiya sisteminə düzgün təqdim etmədiyinə görə, gələcəkdə müvafiq pozuntulara yol verilməməsi üçün vahid informasiya sisteminin iştirakçılarının Əsasnamə ilə müəyyən edilmiş vəzifələrinin icrasına nəzarətin gücləndirilməsi ilə bağlı icrası məcburi sərəncam verib.

Bundan əlavə, Mərkəzi Bank ötən ay “Yapı Kredi Bank Azərbaycan” QSC-nin və “PAŞA Bank” ASC-nin vəzifəli şəxsini cərimələyib.

Belə ki, AMB tərəfindən aparılan cari nəzarət prosesləri çərçivəsində cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin tələblərinin pozulmasının aşkarlanması ilə əlaqədar İnzibati Xətalar Məcəlləsinin (İXM) 598.1.1-ci və 598.1.2-ci maddələrinə əsasən “Yapı Kredi Bank Azərbaycan” QSC-nin vəzifəli şəxsi Nəsimi Rayon Məhkəməsi tərəfindən 8 000 manat məbləğində cərimə edilib.

Eləcə də AMB tərəfindən aparılan cari nəzarət prosesləri çərçivəsində cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin tələblərinin pozulmasının aşkarlanması ilə əlaqədar İXM-in 598.1.1-ci, 598.1.2-ci, 598.4-cü maddələrinə əsasən “PAŞA Bank” ASC-nin vəzifəli şəxsi Ağdam Rayon Məhkəməsi tərəfindən 10 000 manat məbləğində cərimə olunub.

Bundan əlavə, Mərkəzi Bank ötən ay “Turanbank” ASC-ni və onun vəzifəli şəxsini də cərimələyib. Belə ki, Mərkəzi Bankı tərəfindən aparılan cari nəzarət prosesləri çərçivəsində cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin tələblərinin pozulması səbəbi ilə İXM-nin 598.1.2-ci maddəsinə əsasən “Turanbank” ASC 20 000 manat məbləğində, İXM-nin 598.1.1-ci və 598.1.2-ci maddələrinə əsasən “Turanbank” ASC-nin vəzifəli şəxsi isə 10 000 manat məbləğində cərimə edilib.