Azərbaycan Mərkəzi Bankı (AMB) “Kontinent İnşaat” şirkətinə cərimə yazıb.
İqtisadiyyat.az xəbər verir ki, AMB şirkət barəsində İnzibati Xətalar Məcəlləsinin 430.4-cü maddəsinə əsasən cərimə protokolu tərtib edib.
Daha sonra protokol baxılması üçün Yasamal Rayon Məhkəməsinə göndərilib. İş aprelin 23-də hakim Rauf Daşdəmirovun sədrliyi ilə araşdırılacaq.
Məhkəmə iddianı təmin edərsə, tikinti şirkəti cərimə olunacaq.
“Kontinent İnşaat”ın barəsində cərimə protokolu tərtib olunan maddədə deyilir ki, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.
Xatırladaq ki, “Kontinent İnşaat” Azərbaycanın tikinti sektorunda 2010-cu ildən etibarən fəaliyyət göstərir. Qanuni təmsilçisi Mahmudov Araz Ucal oğludur.
