İcbari Sığorta Bürosu (İSB) 2019-cu ildən sonra maliyyə hesabatlarını açıqlamır. 

İqtisadiyyat.az bu barədə Büronun rəsmi elektron səhifəsinə istinadən xəbər verir.

Büronun səhifəsində sonuncu maliyyə hesabatı 2019-cu ilə aiddir. 

Maraqlıdır ki, bu dövr keçmiş icraçı direktor Rəşad Əhmədovun fəaliyyəti dövrünə təsadüf edir. O da bu ilin iyulun 2-dən İSB-dən ayrılıb və Azərbaycan Sənaye Sığorta Şirkətinin direktorlar Şurasının sədri seçilib. 

Büronun fəaliyyətinə Himayəçilər Şurası vasitəsilə nəzarət edən Azərbaycan Mərkəzi Bankı isə maliyyə təşkilatlarına, o cümlədən sığorta bazarına hesabatların operativ açıqlanması ilə bağlı həssas yanaşsa da, İSB-nin hesabatlarını görməzdən gəlib. Büronun Himayəçilər Şurasının sədri Mərkəzi Bankın baş direktoru Ziya Əliyev, üzvlərindən biri isə AMB-nin sığorta departamentinin rəhbəri Vüsal Qurbanovdur. 

Qeyd edək ki, İcbari Sığorta Bürosu zərərçəkən sığorta olunanların və zərər vurulan üçüncü şəxslərin maraqlarının müdafiəsini, icbari sığorta sisteminin sabitliyi və inkişafını təmin etmək üçün, habelə “İcbari sığortalar haqqında” Qanunla nəzərdə tutulan funksiyaların həyata keçirilməsi məqsədilə həmin qanunun tələbləri nəzərə alınmaqla Azərbaycan Respublikasının Mülki Məcəlləsinə uyğun olaraq hüquqi şəxslərin ittifaqı kimi təsis edilib və fəaliyyət göstərir.