Milli Məclisdə mənzillərin qiyməti ilə bağlı məsələ müzakirə olunub.
İqtisadiyyat.az xəbər verir ki, bununla bağlı Milli Məclisin İctimai birliklər və dini qurumlar komitəsinin sədri Fazil Mustafa parlamentin bu gün keçirilən plenar iclasında yeni təklif irəli sürüb.
O bildirib ki, yeni binaların tikiləcəyi ərazilərdə yaşayan sakinlərdən 1-2-si ilə razılaşmayanda vaxt uzanır. Belə olanda da bazarda qiymətlər qalxır.
Deputat mülkiyyətçi kimi vətəndaşın da haqlı olduğunu vurğulayıb. O söyləyib ki, optimal qiymətləndirmə məsələsində narahatlıqlar ortaya çıxır: “Optimal qiymətlər təyin olunmalıdır. Mənzilin kvadratına minimum nə qədər vəsaitin ödənilməsi müəyyənləşməlidir. Müvafiq qurumlar həm sahibkara, həm də mülkiyyətçiyə kömək edəcək addımlar atmalıdır”.
“Qəzalı vəziyyətdə olan 16 minə yaxın mənzil yenidən tikilməlidir. Bu da böyük bir işdir. Bu günlərdə problemin aktuallığını üzə çıxaran mülkiyyətdə olan evin tikinti şirkəti tərəfindən qanunsuz şəkildə sökülməsi ilə bağlı gündəmə gəldi. Təbii ki, bu əsassız və qanunsuz addım idi”, - deputat əlavə edib.
