Bir neçə gün əvvəl Gəncə şəhərində məktəblinin qətlə yetirilməsi orta təhsil müəssisələrində şagirdlər arasında maarifləndirmə tədbirlərinin intensivləşdirilməsini yenidən gündəmə gətirib. Məktəblərdə istər bu kimi, istərsə də digər zorakılıq hallarına zaman-zaman rast gəlinib. Bu kimi analoji hadisələrin qarşısının alınması istiqamətində müəyyən addımlar atılsa da, tam aradan qaldırılmasına nail olunmayıb. Bu istiqamətdə profilaktik tədbirlər kimi həm valideynlərin, həm də müəllimlərin, xüsusən də məktəb psixoloqların rolunun olduğu hər kəsə məlumdur. Bununla yanaşı, texnoloji imkanların inkişaf etdiyi bir dövrdə sosial şəbəkələr vasitəsilə də bu cür hallarla mübarizə aparmaq mümkündür.

Jurnalist Samir Mirzə İqtisadiyyat.az-a açıqlamasında deyib ki, məktəblərdə baş verən ardıcıl böhranlı hadisələrlə əlaqədar olaraq blogerlər, infulunserlər və cəmiyyətdə nüfuzu olan digər şəxslər də fəallıq nümayiş etdirməlidirlər. 

Onun sözlərinə görə, qısa zaman ərzində ilkin mərhələ üçün problemin qismən həll olunmasında ən effektiv işi məhz onlar reallaşdıra bilərlər. 

Jurnalist hesab edir ki, məktəbyaşlı şəxslərə zorakılığın bütün növlərinin zərərli olduğunu anlatmaq üçün tanınmış videoblogerlərin əməyinə ehtiyac var. O, sosial şəbəkələrin fəal istifadəçisi olan fenomenləri, videoblogerləri və infulunserləri bu problemin aradan qaldırılması istiqamətində töhfə verməyə çağırıb:

"Bu yolla faciəvi vəziyyətdən çıxmaq mümkündür, növbəti mərhələdə isə müvafiq qurumlar proqram hazırlamalıdırlar. Mövcud vəziyyətin həlli istiqamətində müxtəlif konstruktiv yollardan istifadə etmək olar, lakin indiki durum böhranlıdır və təcili addımlar tələb olunur".

Sosial media platformalarında qısa videoların, shortların daha sürətlə yayıldığını söyləyən Samir Mirzə deyir ki, videoblogerlər bu problemin həlli naminə müxtəlif səpkidə materiallar təqdim edə bilərlər:

"Çünki qısa videolara maraq böyükdür və sosial şəbəkə platformalarında əksər istifadəçilər bu videolara baxmaqdan yan keçmirlər. Elmi, dərin düşündürən, çətinliklə mesajı başa düşülən videoçarxlara, 5 dəqiqəlik materiala ehtiyac yoxdur. Çox sadə dillə, açıq mesaj verən, rahat şəkildə düşündürən, hamının başa düşəcəyi məzmunun hazırlanması zəruridir. İndiki vəziyyət dəyişməsə sonda hamı əziyyət çəkəcək. Ən mədəni, tərbiyəli ailədən çıxan uşaqlar, eləcə də böyüklər, övladlarımız, hamı potensial qurbandır. Yubanmayaq, əlimizdəki vasitələrdən istifadə edək. Buna görə qapı-qapı düşməyə də razıyam. Təki gələcəyimiz məhv olmasın".

Sadiq Cavadov