"Mərkəzləşdirilmiş müsabiqə formatında məktəb direktorları mövcud pedaqoji işçilərin arasından seçilir". 

İqtisadiyyat.az xəbər verir ki, bu sözləri direktorların işə qəbulu məsələsinə toxunan Elm və Təhsil Nazirliyinin İnsan resursları şöbəsinin müdiri Eşqi Bağırov deyib.

Onun sözlərinə görə, ümumtəhsil müəssisələrində keyfiyyətli təhsilin yolu rəhbərlərin düzgün seçilməsindən keçir:

""Azərbaycan Respublikasında təhsilin inkişafı üzrə Dövlət Strategiyası"nda təhsil sistemində daha şəffaf, səmərəli və nəticələrə görə cavabdeh idarəetmə mexanizmlərinin tətbiqi əsas istiqamətlərdən biri kimi müəyyən olunub. Bu istiqamət bizim üçün prioritetdir. İdarəetmə mexanizmlərinin tətbiqində əsas komponent məktəb direktorlarının, ümumtəhsil müəssisələrinin rəhbərlərinin fəaliyyəti, hazırlığı, seçimi və işə qəbulu prosesləridir. Məlumdur ki, məktəblərin əsas keyfiyyət göstəricilərinə təsir edən amillərdən biri də məktəblərdə idarəetmənin daha səmərəli təşkilidir. Artıq bir neçə ildir ki, nazirlik bu proseslə bağlı vahid, şəffaf və obyektiv bir mexanizm tətbiq edir. Bu mexanizm mərkəzləşdirilmiş müsabiqə formatıdır. Bu formatda məktəb direktorları mövcud pedaqoji işçilərin arasından seçilir. Müsabiqənin bir neçə mərhələsindən uğurla keçən müəllimlər bu vəzifəyə təyin olunur".

Gülşən Şərif