“Azərsun Holdinq” Şirkətlər Qrupuna məxsus "Mamam Chocolate and Bakery" MMC statistik məlumatların verilməsi qaydalarını pozduğuna görə cərimələnib.

İqtisadiyyat.az-ın əldə etdiyi məlumata görə, müvafiq qurum tərəfindən şirkət barəsində İnzibati Xətalar Məcəlləsinin 389-cü (Statistik məlumatların verilməsi qaydalarının pozulması) maddəsinə əsasən cərimə protokolu tərtib edilib. 

Daha sonra protokol baxılması üçün Nərimanov Rayon Məhkəməsinə göndərilib. Məhkəmədə barəsində protokol tətbiq edilmiş şokolad fabriki ilə bağlı müraciətə baxılıb. 

Hakim Xalidə Əlisoyun sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.

Xatırladaq ki, statistik məlumatların verilməsi qaydalarının pozulmasına görə 300 manatdan 500 manatadək məbləğdə cərimə edilir.

Qeyd edək ki, “Azərsun Holdinq” Şirkətlər Qrupuna məxsus "Mamam Chocolate and Bakery" MMC şokolad fabriki 2008-ci ildən etibarən “Bakı Qida və Yağ Fabriki”nin tərkibində fəaliyyət göstərib. Fabrik 2010-cu ildə  “Shokki Mokki” markası ilə istehsala başlayıb. 2019-cu ilin avqust ayından etibarən isə “Mamam Chocolate and Bakery”yə bağlı fəaliyyətini davam etdirməkdədir.