Nizami Rayon Məhkəməsində “Azərsun Holdinq” Şirkətlər Qrupuna məxsus "Azərbaycan Şəkər İstehsalat Birliyi" MMC barəsində tətbiq edilən protokol araşdırılır.

İqtisadiyyat.az-ın əldə etdiyi məlumata görə, müvafiq qurum tərəfindən şirkət barəsində İnzibati Xətalar Məcəlləsinin 483-cü (Xarici valyuta vəsaitlərinin xaricdən qaytarılmaması) maddəsinə əsasən cərimə protokolu tərtib edilib.

Daha sonra protokol baxılması üçün Nizami Rayon Məhkəməsinə göndərilib. Hazırda məhkəmədə barəsində protokol tətbiq edilmiş MMC ilə bağlı müraciətə baxılır. 

Qeyd edək ki, xarici valyuta vəsaitlərinin xaricdən qaytarılmamasına görə inzibati xətanın bilavasitə obyekti olan xarici valyutanın dəyərinin 30 faizindən 50 faizinədək məbləğdə cərimə edilir.

Xatırladaq ki, “Azərbaycan Şəkər İstehsalat Birliyi” MMC 2001-ci ildə təsis edilib və 128.6 mln. manat nizamnamə kapitalı var. MMC tanınmış iş adamı Abdulbari Gözəlin rəhbəri olduğu “Azərsun Holdinq”in törəmə şirkətidir.

“Azərbaycan Şəkər İstehsalat Birliyi” nin qanuni təmsilçisi Mohammad Ali Mahmoodidir.