"Mazarina Trade Company" şirkəti  avtonəqliyyat vasitələrinin texniki vəziyyətinin yoxlanılmasının və sürücülərin tibbi müayinəsinin təşkil edilməməsinə görə qanunvericiliyin tələblərini pozub.

İqtisadiyyat.az xəbər verir ki, buna görə də şirkət barəsində İnzibati Xətalar Məcəlləsinin 326-cı maddəsinə əsasən cərimə protokolu tərtib edilib.

Daha sonra protokol baxılması üçün Nəsimi Rayon Məhkəməsinə göndərilib.

Məhkəmə işi hakim Anar İbadzadənin sədrliyi ilə araşdırılacaq. 

Həmin maddəyə əsasən, sərnişin və yük daşımalarını yerinə yetirən avtonəqliyyat vasitələrinin texniki vəziyyətinin reysqabağı yoxlanılmasının, həmin avtonəqliyyat vasitələrinin sürücülərinin reysqabağı və digər zəruri tibbi müayinəsinin təşkil edilməməsinə görə vəzifəli şəxslər beş yüz manatdan səkkiz yüz manatadək məbləğdə, hüquqi şəxslər iki min manatdan üç min manatadək məbləğdə cərimə edilir.

Qeyd edək ki,  “Mazarina” MMC 1998-ci ildə yaradılıb. 2017-ci ildə “Mazarina” MMC-nin adı “Mazarina Trade Company” MMC-yə rebrendinq edilib. Şirkət şərab və digər alkoqollu məhsulların istehsalı və satışı ilə məşğuldur.