Azərbaycanda alkoqollu içkilərin satışını həyata keçirən "Mazarina Trade Company" MMC icazə olmadan avtomobil nəqliyyatı ilə sərnişin və yük daşınmasına görə cərimələnib.

İqtisadiyyat.az-ın əldə etdiyi məlumata görə, müvafiq qurum tərəfindən şirkət barəsində İnzibati Xətalar Məcəlləsinin 324-cü (İcazə olmadan avtomobil nəqliyyatı ilə sərnişin və yük daşınması) maddəsinə əsasən cərimə protokolu tərtib edilib.

Daha sonra protokol baxılması üçün Abşeron Rayon Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb. Hakim Vaqif Həsənovun sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib. Amma cərimənin miqdarı açıqlanmayıb.

Qeyd edək ki, 1998-ci ildə yaradılmış “Mazarina” MMC “Gəncə Şərab-2” ASC ilə birlikdə şərab və digər spirtli məhsulların istehsalı və satışına başlayıb. 2017-ci ildə “Mazarina” MMC-nin adı “Mazarina Trade Company” MMC-yə rebrendinq edilib. Şirkətin qanuni təmsilçisi (Baş direktoru) Məmmədov Qədir Şirsoltan oğludur.