FİFA U-20 dünya çempionatının qrup mərhələsində Kolumbiya ilə İsrail arasında keçirilən oyunda tribunada Fələstin bayrağını göstərən kolumbiyalı tərəfdar saxlanılıb.
İqtisadiyyat.az xəbər verir ki, İdmanda Zorakılığın Qarşısının Alınması Agentliyinin (APREVIDE) açıqlamasında, Argentinada təşkil edilən FIFA U-20 Dünya Çempionatının qrup matçında tribunada Fələstin bayrağını açan kolumbiyalı tərəfdar Michael Andrés Patino Cifuentesin saxlanıldığı bildirilib.
APREVIDE bildirib ki, kolumbiyalı tərəfdar “rəqib tərəfdarlarını təxribat və zorakılığa təşviq etmək” ittihamı ilə saxlanılıb.
Kolumbiya - İsrail matçı davam edərkən Fələstin bayrağını İsrail tribunasına göstərən kolumbiyalı tərəfdarla ona cavab verən israillilər arasında gərginlik yaranıb.
“Fələstin bayrağının qaldırılması qadağan deyil”
Kolumbiya prezidenti Qustavo Petro matçın görüntülərini Twitter hesabında paylaşaraq "Kolumbiya üçün Fələstin bayrağının açılması qadağan deyil" ifadəsini işlədib.
Argentinanın La Plata şəhərindəki Dieqo Armando Maradona stadionunda keçirilən qrup matçında Kolumbiya İsraili 2:1 hesabı ilə məğlub edib.
Mayın 20-dən iyunun 11-dək keçirilən FIFA U-20 Dünya Çempionatında 24 ölkə iştirak edir.
