Macarıstan Kosovonun Avropa Şurasına (AŞ) daxil olmasını dəstəkləməyəcək, çünki belə bir addımın Serbiya ilə münasibətlərinin normallaşmasına töhfə verməyəcəyinə inanır.
İqtisadiyyat.az xəbər verir ki, bunu Macarıstanın xarici işlər naziri Peter Siyarto Serbiyanın baş nazirinin birinci müavini və xarici işlər naziri İvitsa Daçiç ilə telefon danışığından sonra deyib.
"Macarıstan Belqrad və Priştina arasında dialoqun uğurunda maraqlıdır, lakin biz hesab edirik ki, Kosovonun davamlı olaraq beynəlxalq təşkilatlara qoşulmaq istəyi bu prosesə kömək etmir", - Siyarto "Facebook"da yazıb.
Nazir bildirib ki, Macarıstan Avropa Şurası Nazirlər Komitəsində Kosovonun Şuraya üzv olması məsələsində əleyhinə səs verəcək: "Və biz BMT-də Qərbi Balkan ölkələri arasında münasibətlərdə gərginliyin daha da artmasına səbəb olacaq heç bir təklifi dəstəkləməyəcəyik".
