"Bakıya hər səfərimdə yenilik, gözəllik, modernlik görürəm, buna görə sizləri təbrik edirəm".
İqtisadiyyat.az APA-ya istinadən xəbər verir ki, bunu Macarıstanın xarici işlər və beynəlxalq ticarət naziri Peter Siyarto Bakıda Hökumətlərarası Komissiyanın iclasında çıxışında deyib.
Nazir bildirib ki, artıq Macarıstan və Azərbaycan 14 ildir ki, strateji tərəfdaşdır, iki ölkə arasında əlaqələr yüksək səviyyədədir: "Bir zamanlar bizi Azərbaycanla münasibətlərimizə görə tənqid edənlər indi Azərbaycan Prezidenti ilə foto çəkdirmək növbəsinə durub".
Nazir Siyarto bildirib ki, ötən il Azərbaycan və Macarıstan arasında ticarət dövriyyəsi yüksək həddə çatıb, bu 120 milyon dolları ötüb: "Enerji sahəsində əməkdaşlığımız Macarıstanın təhlükəsizliyinə töhfə verir. Hazırkı vəziyyəti nəzərə alsaq, enerji sektorunda əməkdaşlığımız çox vacibdir."
Nazir ötən il Azərbaycan qazının Macarıstana çatdığını xatırladaraq: "Biz daha çox həcmdə Azərbaycandan qaz almağı planlaşdırırıq, hər iki tərəf bunda maraqlıdır", - deyib.
