“Azərbaycanda əməkhaqqlarının artması ticarət dövriyyəsinin artmasına da gətirib çıxaracaq”.
Bunu İqtisadiyyat.az-a açıqlamasında Milli Məclisin deputatı Vüqar Bayramov deyib.
Deputat bildirib ki, təbii ki, əhalinin gəlirlərinin artması həm də xərcləmələrə təsir göstərəcək: “Çünki daha çox vəsaitin xərclənməsi müşahidə olunacaq. Gəlirlər artırsa, istehlaka xərcləmələr də artacaq. Dövlət büdcəsindən bütövlükdə 17 milyard manata yaxın vəsait sosial istiqamətdə yönəldiləcək. Bu eyni zamanda ticarət dövriyyəsinin artmasına da gətirib çıxaracaq”.
V.Bayramov əlavə edib ki, minimum əməkhaqqının artımı özəl sektorda da çalışanların maaşlarına təsir göstərir: “Özəl sektorda da 400 manatdan az əməkhaqqı verilə bilməz. Amma təbii ki, daha yüksək əməkhaqqının verilməsi özəl sektorun özünün qəbul etdiyi qərardır, çünki dövlət özəl sektorda əməkhaqqı siyasətinə müdaxilə etmir. Yalnız minimum əməkhaqqı müəyyən edilir ki, özəl sektor da bu qaydalara əməl etməlidir”.
Qeyd edək ki, ötən ilin dekabr ayının 23-ü Prezident İlham Əliyev tərəfindən “Əhalinin sosial rifahının yaxşılaşdırılması sahəsində tədbirlərin davam etdirilməsi haqqında” Sərəncam imzalanıb. Sərəncamın icrasına 2025-ci ilin yanvar ayının 1-dən başlanılıb. Belə ki, 2025-ci il yanvarın 1-dən ölkəmizdə minimum aylıq əməkhaqqının məbləği 345 manatdan 16 faiz artımla 400 manata çatdırılıb. “Əmək və məşğulluq” altsistemində olan elektron müqavilələrə işəgötürənlər tərəfindən əsas iş yeri və tam iş vaxtı rejimi üzrə minimun əməkhaqqı məbləğindən aşağı əməkhaqqı daxil edilməsi ilə bağlı məhdudiyyət tətbiq edilib. İnzibati Xətalar Məcəlləsinin 192.3-cü maddəsinə əsasən işçiyə minimum aylıq əməkhaqqından aşağı məbləğdə əməkhaqqı verilməsinə görə inzibati məsuliyyət nəzərdə tutulur.