Paytaxtın Nərimanov rayonu Mayakovski küçəsi 7 üvnanının sakinləri  “Luxe Home” tikinti şirkətindən şikayətçidirlər.

İqtisadiyyat.az xəbər verir ki, bu barədə sakinlər moderator.az-a müraciət ediblər.

Şikayətçi Cəlil Rəşidov iddia edib ki, narazılıqla bağlı bir çox yerlərə müraciət etsə də, hələ də probleminə baxan olmayıb.

O deyir ki, 2014-cü ildən “Luxe Home” tikinti şirkəti yaşadığı Mayakovski küçəsi 7 üvnanında bina inşa edir. Şikayətçi söyləyib ki, şirkət ərazidə avtomobillər üçün nəzərdə tutulan dayanacağın yerində tikinti işləri aparmağa başlayıb: 

"Birinci binanı heç bir təhlükəsizlik tədbirləri görmədən qonşuların evinin yaxınlığında tikdilər. Sonradan mənim evimin bir addımlığında ikinci binanı inşa etməyə başladılar. 2019-cu ildə mənimlə gəlib razılaşmadan, icazəmi almadan evimin 1 metrliyində 8 metr dərinliyində özül qazdılar. Mənim evim 3 mərtəbəlidir, üstü mansarddır. Bu evi o vaxt İcra Hakimiyyətinin və “Baksovet”in sərəncamı ilə tikdirmişəm. Birinci evləri başladılar sökməyə, divarlarını dağıdıb bərbad günə qoydular. Bizdə də evlər bir-birinə bitişik idi. Qonşunun divarını dağıdanda istər-istəməz mənim də evimin divarı zədələnirdi. Tikintinin səs-küyü evimizin içində idi. Səhər saat 6-dan axşam saat 6-ya qədər işləyirdilər. Axşamlar da beton gətirib tökürdülər. Nə gecəmiz var idi, nə də gündüzümüz. O binanı tikib qurtardılar. Sonradan digər tərəfdə yenidən 8 metrlik özül qazıb, 2 mərtəbəli obyekt tikməyə başladılar. Heç bir icazələri falan yox idi. Mənim 3 tərəfdən bütün çıxışlarımı bağladılar. Bircə qarşı tərəfə çıxışımız var. Nə evimizin divarlarını təmir etməyə qoyurlar, nə də özləri edirlər. Dağıtdıqları evin görüntüsünü çəkib məhkəməyə verib deyirlər ki, bu sakinin evi qəzalı vəziyyətdədir. 2011-2012-ci illərdə tikdirdiyim evdir. Necə qəzalı ola bilər? Əraziyə gətirdikləri ekspertlərin hamısını rüşvətlə ələ alıblar, onlar da bunlar deyəni deyir".

Şikayətçi qeyd olunan məsələ ilə bağlı Nərimanov Rayon Məhkəməsinin də fəaliyyətindən narazı olduğunu bildirib. O iddia edir ki, məhkəmə şirkətin diktəsi ilə qərar çıxarır:

"Nərimanov Rayon Məhkəməsi dörd il əvvəl mənim 12 otaqlı 3 mərtəbəli evimə 3 otaqlı ev qərarı çıxardı. Apellyasiya məhkəməsinə müraciət etdim. Məhkəmə rkspertizası təyin olundu. Ekspertiza mərkəzinin çıxardığı qərar onların xoşuna gəlmədi. Ərizələrini geri götürdülər ki, biz şikayətçi deyilik, imtina edirik, evi almırıq. Bundan sonra da mən onları məhkəməyə verdim. Apellyasiya Məhkəməsindəki hakim qərar çıxardı ki, şirkət imtina etdiyi üçün təkrarən onların bu mövzu ilə məhkəməyə müraciət etməyə ixtiyarı yoxdur. Yenidən Nərimanov Rayon Məhkəməsinə müraciət etdim. 1 il məhkəmə prossesi davam etdi. Qarşı tərəf də iddia ərizəsi verdi. Hansı ki, onların bu iddia ərizəsini verməyə ixtiyarı yox idi və hakimin də bu işə baxmağa ixtiyarı yox idi ki. Hakim Nərgiz Tağıyeva mənim iddiamı ləğv edib, onların qanunsuz iddiasını saxladı. Onların satılmayan bir evləri var. 4 otağı ortadan bölüblər, 5 otaq ediblər. Üzr istəyirəm, nə ayaqyolusu var, nə “demaxod”u. Onu mənə təqdim etdilər, hakim də qərar çıxarıb. Ora da mən getmərəm. Apellyasiya məhkəməsinə vermişəm, o da uzana-uzana gedir. İndi ordan qurtarıblar".

Şikayətçi bildirir ki, “Luxe Home” şirkəti hazırda “Luxe Home inşaat” adı ilə ona verdikləri 4 metrllik yolun qarşısında, qapısından 3-4 metr aralıda yeni bina inşa edir: "Eyni şirkətdir, sadəcə adını “Luxe Home inşaat” qoyublar. Digəri isə “Luxe Home”dir. Bu işlərin hamısı Şəhərsalma və Arxitektura Komitəsinin sərəncamı ilə gedir. Əslində bu qurumun ixtiyarı yoxdur ki, insanlar oradan köçürülmədən sərəncam versin, amma veriblər. Hamısına müraciət etmişəm, heç bir xeyri də yoxdur. İndi düz başımızın üstündə ucaldırlar binanı. Qapıdan çıxmağa qorxuruq ki, başımıza nəsə düşər. Uşaqlar, böyüklər üçün təhlükəlidir. Nə setka vurublar, nə də bir şey. 2-3 dəfə yuxarıdan mismarlı taxtalar, armaturlar düşüb. Allah saxlayıb bizi. Fövqəladə Hallar Nazirliyinin Tikintidə Təhlükəsizliyə Nəzarət Agentliyinin qaynar xəttinə zəng edib məlumat vermişəm. Heç kim gəlib maraqlanmır, heç nə də etmirlər. O tikdikləri 2 mərtəbəli obyektin üstünü də penoplas adlı yanan materialla örtüblər. Hansı ki, 2015-ci ildə Binəqədi rayonunda faciə ilə nəticələn dəhşətli yanğından sonra binaların penoplasla üzlənməsi qadağan edilib. Tikintidə Təhlükəsizliyə Nəzarət Agentliyinin əməkdaşları ümumiyyətlə bu tərəfə çevrilib baxmırlar ki, o adamın nə problemi var?! Şirkətin rəhbəri də, həmin şirkətin vəkili də deyir ki, biz hamısının hörmətini etmişik, nə istəyirsiz edin, siz məğlub olacaqsınız!”. Hamı köçüb, bir tək mən qalmışam. Qonşularda 1 mərtəbəli ev idi, evləri pis vəziyyətdə idi. Mənimlə prinsip edirlər. “Luxe Home” evimi təhlükə ilə üz-üzə qoyub, uçurdur".

Cəlil Rəşidov aidiyyəti qurumlardan bu məsələyə reaksiya vermələrini xahiş edib.