İqtisadiyyat.az xəbər verir ki, bu barədə Los-Anceles hakimiyyəti şəhərdə 9 gündür davam edən meşə yanğınları ilə bağlı yenilənmiş təfərrüatları paylaşıb.

Səlahiyyətlilər yanğınlarda həyatını itirənlərin sayının 25-ə yüksəldiyini, 12 mindən çox tikilinin dağıldığını açıqlayıb.

Milli Meteoroloji Xidmət güclü külək və quru hava şəraiti səbəbindən yeni yanğınların başlaya biləcəyi barədə xəbərdarlıq edib. Küləyin intensivliyi təhlükəli həddə çatdıqdan sonra xidmət bölgədə yanğın xəbərdarlığını uzadıb.

Yanğının yayılmasının qarşısını almaq üçün səlahiyyətlilər bölgədə 77 mindən çox evin elektrik enerjisini kəsib. Nadir hallarda rast gəlinən və hündürlüyü 10-50 metrə çata bilən alov tornadoları yanğının intensivliyini artırır və alovun böyüməsinə səbəb olur.

Yanvarın 7-də səhər saatlarında Los-Ancelesin müxtəlif yerlərində başlayan və güclü külək səbəbindən sürətlə yayılan yanğınlarda indiyədək 37 min dekardan çox ərazi yanaraq kül olub. Yanğınlarla əlaqədar 150 minə yaxın insan üçün təxliyə əmri verilib.

Davam edən yanğınların vurduğu ümumi zərər və iqtisadi itki 250-275 milyard dollar arasında qiymətləndirilir.

 

Gözəl Həşimova