Böyük Britaniya hökuməti yaxın vaxtlarda Şimali İrlandiyanın İrlandiya Respublikasına birləşdirilməsi ilə bağlı referendumun keçirilməsinə icazə vermək niyyətində deyil. 

İqtisadiyyat.az xəbər verir ki, bu barədə Britaniyanın Şimali İrlandiya üzrə naziri Hilari Benn "Sky News" telekanalında bildirib.

Onun fikrincə, hazırda belə səsvermə üçün şərait yetişməyib: "Yaxşı Cümə Sazişi çox diqqətlə öyrənildi, müzakirə edildi, layihə mərhələsində düzəlişlər edildi və imzalandı. Səsvermənin şərtləri və ya meyarları çox aydındır. Bu, yalnız o zaman mümkün olacaq ki, Şimali İrlandiya xalqı vahid İrlandiyaya səs verəcək. Bu şərtin yerinə yetirildiyinə dair heç bir sübut yoxdur".

1998-ci ildə imzalanmış "Belfast Müqaviləsi" (Yaxşı Cümə Sazişi) Şimali İrlandiyanın Birləşmiş Krallığın tərkibində qalmasını istəyən protestant loyalistlər (Unionistlər) ilə Böyük Britaniya ilə ittifaqı pozaraq İrlandiyaya qoşulmaq istəyən katolik millətçiləri arasında Olsterdə silahlı qarşıdurmaya son qoyub. Böyük Britaniya və İrlandiyada "Troubles" kimi tanınan 30 il davam edən qarşıdurma zamanı həlak olanların sayı 3,5 mini ötüb, zərərçəkənlərin sayı isə təxminən 50 mini keçib.