Nizami rayonu, Babək prospekti 71 ünvanında yerləşən binanın liftinin qəzalı vəziyyətdə olması sakinlər üçün təhlükəyə çevrilib.
Bu barədə İqtisadiyyat.az-a həmin binanın sakinləri məlumat verib.
Onların sözlərinə görə, dəfələrlə müvafiq qurumlara və binanın komendantına öz narazılıqlarını bildirsələr də, indiyədək əməli olaraq heç bir tədbir görülməyib. Qeyd edilib ki, 1987-ci ildə tikilmiş təkbloklu binanın lifti uzun illərdir qəzalı vəziyyətdədir. Bundan başqa, blokun və liftin təmizliyinə nəzarət edilmədiyi bildirilib: "Binanın işıqlandırılması da yoxdur. Hər dəfə liftin təmiri və işçi üçün ayrıca rüb üzrə vəsait toplansa da, ortada heç bir nəticə yoxdur. Qaimədə lift işçisinin adı yazılır, amma onun üzünü sonuncu dəfə nə zaman gördüyümüzü xatırlamırıq. Yəni liftçinin adı var, özü yoxdur".
Bina sakinləri bu vəziyyətdən narahat olduqlarını və müvafiq qurumlardan kömək istədiklərini söyləyiblər: "Xahiş edirik ki, müvafiq qurumlar problemin tezliklə aradan qaldırılması üçün diqqət göstərsinlər. Çünki binadakı vəziyyət həqiqətən ağırdır və sakinlərin həyatını təhlükə altına salır".
Məsələ ilə bağlı Nizami Rayon İcra Hakimiyyətindən İqtisadiyyat.az-a bildirilib ki, sözügedən bina mənzil-tikinti kooperativ bina olduğu üçün problemlərini özləri həll etməlidir. Qeyd edilib ki, binanın həyətinin işıqlandırılması və lift probleminin həlli isə Mənzil Mülkiyyətçiləri Müştərək Cəmiyyəti tərəfindən həllini tapmalıdır və həmin binanın məsələsi Nizami Rayon İcra Hakimiyyətinin səlahiyyətində deyil.
Sakinlər isə bu problemin aradan qaldırılmamasında binanın komendantı Rəhim Məhərrəmovu günahkar bilirlər. Onlar deyir ki, komendant bu vəziyyətə qeyri-ciddi yanaşır.
Yaşayış binasının kooperativinin sədri Rəhim Məhərrəmov isə İqtisadiyyat.az-a açıqlamasında sözügedən problemin həqiqəti əks etdirmədiyini, yalan və böhtan xarakterli olduğunu söyləyib.
Sakinlərin narazılıqlarını əsassız sayan R.Məhərrəmov hazırda liftin işlədiyini bildirib. Kooperativ sədrinin sözlərinə görə, liftin düymələrinin yerində olmaması müvəqqəti problemdir və bu da aradan qaldırılacaq, düymələr yenisi ilə əvəz olunacaq.
O, həmçinin binanın sakinlərini lift pulu verməməkdə ittiham edib. Liftin fəaliyyətinə mütəmadi olaraq mexanik və Fövqəladə Hallar Nazirliyi tərəfindən nəzarət edildiyini vurğulayıb.
İqtisadiyyat.az mövzuya aid videogörüntüləri təqdim edir:
Gülşən Şərif
