ABŞ-nin "Frontier Airlines" aviaşirkətinə məxsus San-Dieqo - Las-Veqas marşrutu üzrə 1326 saylı reysi yerinə yetirən təyyarə Nevada ştatının Las-Veqas şəhərində sərt eniş edib və yanmağa başlayıb.

İqtisadiyyat.az xəbər verir ki, bu barədə "CBS News" telekanalı hava limanı və aviaşirkət nümayəndələrinə istinadən məlumat yayıb.

Hadisə "Harry Reid" beynəlxalq hava limanında baş verib. Hadisə şahidlərinin çəkdiyi videoda eniş zamanı təyyarənin şassisində alov və tüstü görünüb. Bundan dərhal sonra yanğınsöndürənlər və təcili yardım maşınları təyyarəni söndürmək üçün hadisə yerinə tələsiblər.

"Frontier Airlines"in nümayəndəsinin sözlərinə görə, bütün sərnişinlər və ekipaj üzvləri təyyarədən təxliyə olunublar. Yaralananlar barədə məlumat verilməyib. Hadisənin səbəbi araşdırılır.