"Bakı iqlim məsələlərinin müzakirəsi üçün önəmli mərkəzə çevrilib".
Bu sözləri İqtisadiyyat.az-a açıqlamasında Milli Məclisin deputatı Könül Nurullayeva deyib.
COP29 çərçivəsində Bakıda effektiv müzakirələrin davam etdirildiyini vurğulayan deputatın sözlərinə görə, 196 ölkədən 72 min iştirakçının qeydiyyatdan keçməsi, onların arasında 80 prezident, vitse-prezident və baş nazirin olması konfransa marağın göstəricisidir:
"Müzakirələrdə əsas diqqət yeni iqlim maliyyəsi hədəfinə yönəlib. Sevindirici haldır ki, COP29-un ilk günündə Paris Sazişinin 6.4 maddəsi üzrə vahid mexanizm barədə razılığa gəliblər. Bu da ümumilikdə prinsipial xarakter daşıyan 6-cı maddə üzrə razılaşmanın əldə olunmasına ümidləri artırır. Artıq beynəlxalq maliyyə korporasiyaları və bank strukturları da iqlim dəyişikliklərinin fəsadlarına qarşı mübarizə məqsədilə öz maliyyə töhfələrini artırmaqla bağlı açıqlamalar veriblər. Bakıda aparılan müzakirələrdən aydın oldu ki, iqlim maliyyəsi ilə təkcə iqlimlə bağlı təşkilatlar məşğul olmur. Bütün maraqlı tərəflər bir araya gələrək iqlim maliyyəsinə asan çıxışları təmin etməlidir. Kiçik ada dövlətlərinin sammiti də səmərəli müzakirələrlə yadda qaldı. Bu tədbirdə bir daha bəyan olundu ki, kiçik ada dövlətlərinin də hüquqları müdafiə olunmaqdadır".
"Bakıda aparılan müzakirələrdə verilən əsas mesajlardan biri də budur ki, COP29-da qəbul edilən qərarlar yaxın onilliklər ərzində ölkələrin iqtisadiyyatlarının inkişafı qaydalarını müəyyən edəcək. Bütün tərəflər yeni kəmiyyət həddi ilə bağlı iddialı və güclü razılaşma əldə ediləcəyinə çalışır. İqlim mütəxəssisləri də bu fikirdədir ki, bu məqsəd beynəlxalq maliyyə institutlarına daha çox iqlim maliyyəsi təmin etmək və onun effektivliyini yüksəltmək, özəl kapitalı səfərbər etmək üçün çox vacibdir", - K.Nurullayeva söyləyib.
İsmayıl Bakuvi
