Milli Məclisin İqtisadi siyasət, sənaye və sahibkarlıq komitəsinin iclası keçirilib. Bu barədə Milli Məclisin Mətbuat və ictimaiyyətlə əlaqələr şöbəsindən məlumat verilib.

Komitə sədri Tahir Mirkişili Konstitusiya Məhkəməsi Plenumunun 23 iyul 2020-ci il tarixli qərarından danışıb.

Həmin qərar ipoteka saxlayanın məhkəmə qaydasında təmin olunmuş tələbi əsasında keçirilmiş təkrar hərracın baş tutmamış elan edilməsi ilə bağlıdır. Bu halda ipoteka predmetinin ipoteka saxlayan tərəfindən əldə edilməsi zamanı sadələşdirilmiş verginin ödənilməsi qaydalarının adı çəkilən qərarın təsviri-əsaslandırıcı hissəsində əks olunan hüquqi mövqelər nəzərə alınmaqla tənzimlənməsi Milli Məclisə tövsiyə olunub.

Bu məqsədlə Milli Məclisin İqtisadi siyasət, sənaye və sahibkarlıq komitəsi tərəfindən  Mülki və Vergi məcəllələrinin, “İpoteka haqqında” və “İcra haqqında” qanunların bəzi müddəalarının tənzimlənməsi məqsədi ilə işçi qrupu yaradılıb.

İşçi qrupun tərkibinə komitə sədri Tahir Mirkişili, komitənin üzvləri Əli Məsimli, Mahir Abbaszadə, Vüqar Bayramov, Elnur Allahverdiyev, habelə  İqtisadiyyat Nazirliyi yanında Dövlət Vergi Xidməti, Ədliyyə nazirliyi, Azərbaycan Banklar Assosiasiyasının, Respublika Xammal və Əmtəə Birjasının nümayəndələri daxildirlər.

İclas zamanı komitənin üzvü Dövlət Vergi Xidmətinin rəsmisi Nicat İmanov daşınmaz əmlakların təqdim edilməsində satış və yaxud girov qoyulan əmlakın girov saxlayana keçməsi üsulu zamanı bərabərlik prinsipinin qorunmasının vacibliyini qeyd edib. O, həmçinin bildirib ki, vergi tutulması ilə bağlı zəruri aydınlaşdırıcı müddəanın daxil edilməsi olduqca önəm kəsb edən məsələdir. Eyni zamanda bankların fəaliyyətinin əhəmiyyəti və onların vergi yükünün azaldılması üçün vergi məcəlləsinə dəyişikliklər çərçivəsində ƏDV ilə bağlı  güzəştlər də nəzərdə tutulub.

Qeyd edək ki, deputatlar və dəvət olunmuş mütəxəssislər öz çıxışlarında adları çəkilən sənədlərdə mövcud olan qeyri-müəyyənliyin aradan qaldırılması, o cümlədən sahibkarlara dövlət dəstəyinin əhəmiyyəti ilə bağlı fikirlərini açıqlayıb, rəy və təkliflərini bildiriblər.

Müzakirələrin sonunda qeyd edilib ki, səsləndirilən təkliflər toplanaraq müvafiq qanunların təkmilləşməsində istifadə edilmək üçün nəzərə alınacaq.