Konqo Respublikasında paytaxt Brazzavil də daxil olmaqla 5 bölgədə “meymun çiçəyi” (Mpox) xəstəliyinin aşkarlanmasından sonra epidemiya elan edilib.

İqtisadiyyat.az xəbər verir ki, bu barədə Konqo Respublikasının Səhiyyə naziri Gilbert Mokoki məlumat verib.

Nazir ölkədə 19 “meymun çiçəyi”nə yoluxmanın qeydə alınmasından sonra epidemiya elan edildiyini açıqlayıb.

İndiyə qədər heç bir ölüm halının qeydə alınmadığını vurğulayan G. Mokoki əhalini şübhəli hallardan və heyvanlarla yaxın təmasdan qaçmağa çağırıb.

Adətən heyvandan insana, nadir hallarda isə insandan-insana yaxın təmas yolu ilə keçən virus bədəndə yüksək hərarət və qaşınma qabarcıqlarına səbəb ola bilər.

Qeyd edək ki, 28 noyabr 2023-cü ildə Ümumdünya Səhiyyə Təşkilatı (ÜST) irqçi və damğalayıcı dildən qaçmaq üçün “meymun çiçəyi” (Monkeypox) virusunun adının "Mpox" adlandırılmasına qərar verdiklərini açıqlayıb.