Əfqanıstanda hakimiyyəti ələ keçirmiş Taliban hərəkatının qüvvələri ilə Pakistanın sərhəd qoşunları arasında iki ölkənin sərhədində silahlı toqquşmalar baş verib.
İqtisadiyyat.az xəbər verir ki, bu barədə Əfqanıstanın "TOLOnews" telekanalı mənbələrə istinadən məlumat yayıb.
Məlumata görə, döyüşlər yerli vaxtla saat 19:00-da (Bakı vaxtı ilə 18:30) Xost vilayətində başlayıb. Yüngül və ağır silahların iştirak etdiyi toqquşmaların Talibanın üç gündür mübahisəli sərhəd bölgəsində postlar tikdiyi üçün başladığı bildirilir. Zərərçəkənlər barədə məlumat verilmir.
Əfqanıstan və Pakistan arasındakı sərhəd mübahisəsi dünyada ən uzun sürən mübahisələrdən biridir. İngilis və Əfqanıstan mülkləri arasında delimitasiya sazişi 1893-cü ildə Kabildə Əmir Əbdürrəhman Xan və ser Henri Mortimer Durand tərəfindən imzalanıb. 1947-ci ildə Britaniya Hindistanı dağılana qədər əfqan hökmdarları Durand xəttini tanısalar da, 1947-ci ildən müstəqil Pakistanın yaranmasından sonra Kabil bu xətti rəsmi sərhəd kimi tanımır. Əfqanıstan-Pakistan ərazi mübahisəsi tez-tez silahlı toqquşmalara səbəb olur.
