Pakistanın təhlükəsizlik qüvvələri ölkənin şimal-qərbindəki Hayber-Paxtunxva əyalətində azı səkkiz silahlını məhv edib.

İqtisadiyyat.az xəbər verir ki, bu barədə "The News International" məlumat yayıb.

Öldürülən terrorçular aprelin 18-də və 20-də Dera İsmayıl Xan bölgəsində Pakistan Gömrük Xidmətinin əməkdaşlarına qarşı hücumlarda iştirak ediblər. Hücumlar nəticəsində səkkiz gömrük əməkdaşı ölüb, dördü isə yaralanıb.

Pakistan Daxili İşlər Nazirliyinin məlumatına görə, 2024-cü ilin əvvəlindən Xayber-Paxtunxva əyalətində terrorçu qrupların azı 88 silahlısı məhv edilib. Onların arasında martın 26-da Qarakoram şossesində çinli texniki mütəxəssislərin olduğu avtobusa intiharçı hücumunda iştirak edən ekstremistlər də var. Hücum nəticəsində beş Çin vətəndaşı və bir pakistanlı sürücü həlak olub.

Pakistan Təhlükəsizlik Araşdırmaları Mərkəzinin məlumatına görə, yanvarın 1-dən bu yana terrorçular İslam Respublikasında 245 hücum həyata keçirib, nəticədə həlak olan polis əməkdaşları və mülki şəxslərin sayı 281 nəfərə çatıb, daha 370 nəfər yaralanıb.