Rusiyanın kibertəhlükəsizlik məhsulları istehsalçısı "Kaspersky Lab" Çinin cənubunda məlumat mərkəzi yaratmağı planlaşdırır. 

İqtisadiyyat.az xəbər verir ki, bu barədə "China Daily" qəzeti məlumat yayıb.

Nəşr şirkətin idarəedici direktoru, "Kaspersky APEC"in işinə nəzarət edən Adrian Khiaya istinad edərək yazır ki, yeni obyekt böyük ehtimalla Quizhou əyalətində tikiləcək. Bu məqsədlə artıq investisiyalar nəzərdə tutulub.

Khianın sözlərinə görə, "Kaspersky Lab" həmçinin Quanqdonq əyalətini və Çin Xalq Respublikasının iki xüsusi inzibati bölgəsini - Honq Konq və Makaonu əhatə edən Böyük Körfəz Bölgəsində bazar imkanlarını araşdırmağa hazırlaşır: "Bir çox ölkələrin məlumatların suverenliyinə xüsusi diqqət yetirdiyi indiki şəraitdə yerli təmsilçiliyin olması bizim üçün böyük əhəmiyyət kəsb edir".

Bundan əlavə, Rusiya şirkəti Çin müəssisələrinin xarici bazarlara çıxması zamanı qarşılaşdıqları kibertəhlükəsizlik problemlərinin həllinə diqqət yetirəcək. Söhbət istehsalın, satışın və xidmətlərin qorunmasından gedir.