ABŞ-nin keçmiş Xarici İşlər naziri Henri Kissincer yenə ittihamlarla üz-üzədir. İqtisadiyyat.az “The Intercept” dərgisinə istinadən xəbər verir ki, sabah 100 yaşı tamam olacaq ABŞ-ın keçmiş Xarici İşlər naziri elə sözügedən dərgi tərəfindən 3 milyon dinc insanın ölümündə günahlandırılır.
ABŞ ordusunun arxivlərindəki sənədləri araşdıran redaksiya heyəti Kissincerin 100-cü yaşı ərəfəsində onun haqqında bir araşdırma yazısı dərc edib. Məqalədə 1969-1970-ci illərdə Kambocada həyata keçirilən hərbi əməliyyatlarda ən azı 150000 mülki şəxsin ölümündə Kissincerin məsuliyyət daşıdığı irəli sürülüb.
Yazıda əvvəllər dərc olunmamış əməliyyat məlumatları və hücumlardan sağ çıxanlarla müsahibələr yer alıb. ABŞ ordusu həm Vyetnam müharibəsi, həm də Kamboca vətəndaş müharibəsi zamanı taktiki bombalama əməliyyatı icra edib. Araşdırma yazısında 18 mart 1969-cu il - 26 may 1970-ci il tarixləri aralığında həyata keçirilən gizli əməliyyatda B-52 strateji bombardmançı təyyarələrin bölgədə 3875 uçuş etdiyi və bunların hamısının Kissincer tərəfindən şəxsən təsdiqləndiyi irəli sürülüb. Məlumatda qeyd olunur ki, təkcə 1973-cü ildə Kambocaya ən azı 257 min ton bomba atılıb.
İndiyə qədər Kambocada dövrün bütün mülki ölümləri, qırmızı kxmerlərin adına yazılırdı. Məqalənin müəllifi jurnalist Nik Turse 2010-cu ildə Kissincerlə görüşdüyünü bildirib. Onun sözlərinə görə, keçmiş nazir bu hücumlar zamanı 50 min mülki vətəndaşın həlak olduğunu şəxsən ona etiraf edib. Lakin məqalənin hazırlanmasında jurnalistlə birgə işləyən və arxiv sənədlərini araşdıran Yeyl Universitetindən Ben Kiernan mülki itkilərin 150 minə yaxın olduğunu bildirib. Araşdırmada qeyd olunur ki, bu bombardmanlarda ABŞ-nin Əfqanıstan, İraq, Liviya, Pakistan, Somali, Suriya və Yəməndəki hərbi hava hücumlarından təxminən 6 dəfə çox dinc sakin həlak olub.
Yeyl Universitetinin Soyqırım Araşdırmaları Proqramının keçmiş direktoru Kiernan Kissincerin o dövrdə Şərqi Timor və Banqladeşdəki soyqırımları da dəstəklədiyini bildirib. Akademikin sözlərinə görə 1970-ci illərdə Mərkəzi Kəşfiyyat İdarəsinin (MKİ) dəstəyi ilə Latın Amerikasındakı diktaturalar tərəfindən həyata keçirilən Kondor Planında keçmiş diplomatın da əli var. Sözügedən plan çərçivəsində ABŞ kəşfiyyatı kommunist və müxalifət təşkilatlarını məhv etmək üçün Paraqvay, Braziliya, Argentina, Uruqvay, Boliviya və Çili kimi ölkələrdə çevriliş və ölüm qruplarına dəstək verib.
Araşdırmanın sonunda müəllif Kissincerin ümumilikdə ən azı 3 milyon dinc insanın ölümünə görə məsuliyyət daşıdığını bildirib. Jurnalist yazını hazırlayarkən yenidən Kissincerlə əlaqə saxlayıb, lakin keçmiş nazir bu iddiaları rədd edib.
Qeyd edək ki, Henri Kissincer 22 sentyabr 1973-cü il - 20 yanvar 1977-ci il tarixlərində vəzifə başında olub və iki prezident - Riçard Nikson və Cerald Fordun administrasiyalarında çalışıb. O, "Vyetnam müharibəsində atəşkəs əldə olunması və Amerika qüvvələrinin çıxarılması məqsədi güdən 1973-cü il Paris sazişinə görə" həmin Nobel Sülh mükafatına layiq görülüb.
