Kanadanın baş naziri Castin Trüdo və Polşa prezidenti Anjey Duda Ukraynaya əlavə yardımın göstərilməsi məsələlərini müzakirə ediblər. 

İqtisadiyyat.az xəbər verir ki, bu barədə Kanada hökuməti başçısının mətbuat xidmətinin şənbə günü yaydığı məlumatda deyilir.

"Bu gün (20 aprel) baş nazir Castin Trüdo Kanada Qüvvələrinin Esquimaltdakı bazasında Polşa prezidenti Anjey Duda ilə görüşüb. Tərəflər Ukraynaya davamlı dəstəyini təsdiqləyib və Kiyevə əlavə yardımın göstərilməsi variantlarını müzakirə ediblər", - məlumatda qeyd olunub. 

Bundan əlavə, Trüdo və Duda Kanada və Polşa arasında ikitərəfli əməkdaşlığı, həmçinin iyulda Vaşinqtonda keçiriləcək NATO sammiti ərəfəsində transatlantik əməkdaşlığın gücləndirilməsi mövzusunu müzakirə ediblər.

Daha əvvəl Trüdonun mətbuat xidməti Dudanın aprelin 18-dən aprelin 23-dək Kanadada səfərdə olacağını, səfər zamanı baş nazirlə təhlükəsizlik və iqtisadi əməkdaşlığı müzakirə edəcəyini bildirmişdi.