2024-cü ilin iyul ayında Rusiyadan benzin ixracı 33% azalıb, daxili bazara tədarük isə bir il əvvəllə müqayisədə 5% çox olub.

İqtisadiyyat.az xəbər verir ki, bu barədə Rusiya Federasiyası Energetika Nazirliyi rəhbərinin birinci müavini Pavel Sorokin Dövlət Dumasının komitələrinin birgə iclasında bildirib.

Sorokin əlavə edib ki, daxili bazara dizel yanacağının tədarük həcmi indi ötən illə müqayisədə 8% çoxdur. Onun sözlərinə görə, ixrac da ötən ilin göstəricilərini üstələyib. Bundan əlavə, nazir müavini qeyd edib ki, Rusiya güclü benzin ehtiyatı yaratmağa nail olub və onların həcmi yayın əvvəli ilə müqayisədə 1% çoxdur.

Energetika Nazirliyi rəhbərinin birinci müavini vurğulayıb ki, hazırda Rusiyada orta gündəlik neft emalı 2023-cü ilin iyunundan 4% çoxdur.

 

Sadiq Cavadov