İsveçrə Avropa İttifaqının (Aİ) 14-cü anti-Rusiya sanksiyalar paketi çərçivəsində Rusiya Federasiyasına qarşı yeni məhdudiyyətlər tətbiq edib.
İqtisadiyyat.az xəbər verir ki, bu barədə hökumətin saytında dərc olunmuş məlumatda deyilir.
"21 avqust 2024-cü ildə Federal Şura Aİ-nin Rusiyaya qarşı 14-cü sanksiyalar paketinin bir sıra digər tədbirlərinə qoşulmaq barədə qərar qəbul edib. Səlahiyyətlilər xatırladıblar ki, İsveçrə iyulun 9-da Aİ-nin anti-Rusiya məhdudiyyətləri paketinə qoşulub və sanksiya siyahısına 69 şəxs və 47 təşkilat əlavə edib", - məlumatda qeyd olunub.
Xüsusilə, yeni tədbirlər çərçivəsində ölkə hökuməti Rusiya almazlarının idxalına qoyulan qadağanın meyarlarına aydınlıq gətirib. Əvvəllər Avropa İttifaqı 14-cü sanksiyalar paketi çərçivəsində Rusiya mənşəli almazların müəyyən növlərinin idxalına icazə verib.
Federal Şura həmçinin Rusiyadan investisiyaların çıxarılması üçün icazələrin verilməsi müddətini uzadıb.