Müşahidələr göstərir ki, Azərbaycanda ingilis və rus dillərində bilmək tələbi iş elanlarının əsas şərtləri sırasında yer alır. Əcnəbi dilləri bilmək əlbəttə ki, üstünlükdür. Lakin iş elanlarında bu üstünlüyün əsas şərt olaraq tələb olunması birmənalı qarşılanmır. Ortaya aktual bir sual çıxır: işəgötürən dil biliklərinə yoxsa, peşəkarlığa daha çox önəm verməlidir?  

Mövzu ilə bağlı İqtisadiyyat.az-ın suallarını cavablandıran İnsan Resursları Assosiasiyasının İdarə Heyətinin üzvü İlkin Məcidov dil bilikləri ilə peşəkarlığı bir-birindən ayırmağın tərəfdarı deyil: “Bir kadr özünü daha çox inkişaf etdirmək, peşəkarlığını daha çox artırmaq istəyirsə, bir yerdən sonra beynəlxalq təcrübəyə müraciət etməyə başlayacaq ki, bu zaman da dil faktoru önə çıxmış olacaq. Əgər bir kadrın əcnəbi dil bilgisi zəifdirsə və ya yoxdursa, onun peşəkarlığı yarımçıq qalmış olur”. 

İ.Məcidovun sözlərinə görə bu gün tək özəl şirkətlərdə deyil, dövlət müəssisələrində də işə qəbul zamanı xarici dil bilənlərə üstünlük verilir. Məhz bu səbəbdən xarici dil kurslarına tələbatın artdığı müşahidə olunur.

Tədris mərkəzlərindən birinin direktoru Arzu Hacıyeva ən çox hansı əcnəbi dillərə tələbat olduğundan söz açıb: Hazırda ingilis, rus, ərəb və alman dillərinə tələbat daha çoxdur. Gənclər təbii ki, öz gələcək karyeraları üçün bu dilləri mənimsəməyi hədəfləyir və mərkəzimizə müraciət edirlər”. 

Deputat Jalə Əhmədova isə hesab edir ki, bir çox şirkətlərin işə qəbul zamanı xarici dil tələb etməsi düzgün deyil. Onun sözlərinə görə, Əmək Məcəlləsində işə qəbul zamanı xarici dil tələbi öz əksini tapmayıb: “Əgər vətəndaş Azərbaycan Respublikasında işləyəcəksə, Azərbaycan Respublikasının da öz dili var. Bu, Azərbaycan dilidir. Bütün iş yerlərində, bütün sənədləşmələr və digər işlər Azərbaycan dilində aparılır. Bəzi hallarda yetəri qədər təcrübəsi olan insanlar işsizliklə üzləşirlər. Onlara belə bir tələb qoyulur ki, xarici dil biliyiniz olmalıdır. Bu, sadəcə işə götürməmək üçün bəhanədir”.

Görünən odur ki, xüsusən özəl şirkətlərdə işəgötürənlərin qoyduğu tələblər günü-gündən daha da sərtləşir. Gəlirli iş əldə etmək üçün bir və ya bir neçə dil biliyinin olması vacib şərtə çevrilib. Müxtəlif sadə peşələrdə çalışmaq istəyən gənclər isə bunu özünə maneə kimi görürlər.